الأربعاء، 31 مارس 2010

قم لي .. ووفني التبجيلا

بسم الله الرحمن الرحيم
.
قبل أيام دخلت المدرسة ..
لآخذ أخي المريض ..
.
كان الحارس بانتظاري ..
فطلب أن أبقي لديه إثباتي ..
.
دخلت غرفة المدير المساعد ..
ورأيته كيف يضبط المدرسة بصرخة منه ..
.
لم يدر في خلدي ..
أن أدخلها بعد أسبوع كمعلم ..
.
دخلت وسلمت على الحارس ..
وأخبرته بأنني أنا من أتى قبل أسبوع ..
.
فضحك ..
.
دخلت غرفة المدير المساعد ..
عرفته بنفسي ..
وسلمته قرار تعييني ..
.
ذهبنا للقسم الذي سيحتضننا في السنوات العشر القادمة ..
وبعدها .. سأحتل مكتب المدير المساعد إن شاء الله
.
تم التعارف مع الزملاء ..
وإرتاحت أنفسنا أنا وأستاذ حسين ..
.
فنعم القسم ..
ونعم الزملاء ..
.
تمت ضيافتنا الضيافة العربية الأصيلة ..
قهوة عربية مع التمر ..
.
ثم ناولنا الأستاذ علي بعض "السمبوسة" ..
كانت بالجبن .. لذيذة جدا
.
اليوم هو يومي الثاني ..
.
جلس معنا رئيس القسم أستاذ عبدالرضا ..
وأعطانا جدول الزيارات ..
بحيث نزور الزملاء في الحصص ..
.
لنتعلم منهم طبعا ..
وليس لنقيمهم ..
.
تأخر الأستاذ عبدالعزيز ..
فوقفت بجانب باب الفصل منتظرا ..
.
أطل علي أحد الطلبة من النافذة ..
وقال :
"انت الأستاذ اليديد؟ حياك تعال درسنا"
.
إتسعت حدقتا عينيّ ..
وصارتا بهذا الشكل @@
.
قلت له بحزم :
"دش صفك وسكّر الدريشة"
.
قال :
"إن شاء الله أستاذ"
.
أدرت وجهي وضحكت ..
.
فبأول إحتكاك لي بالطلبة ..
كنت حازما بجدارة ..
.
ولو إمتد الحوار لربع دقيقة أخرى ..
لفقدت هيبتي .. لأنني ضحكت
.
وصل الأستاذ ..
ودخلت مع الصف ..
.
"السلام عليكم أستاذ عبدالعزيز"
"هلا أستاذ .. وعليكم السلام .. قيام يا شباب"
.
كنت سأضحك مرة أخرى ..
فالاحساس حينها لا يضاهى ..
.
جلست في الخلف ..
بجانب الطالب فهد ..
.
كان يبدو مؤدبا ..
لكنه في الحقيقة مشاغب ..
.
طلب منه الأستاذ رمي العلك ..
فقام بحركة توحي برميه .. ولكنه إحتفظ به
.
فأخذت دفتره وقلمه ..
وكتبت له :
"قالك قط العلج .. لا تستغفل أستاذك"
.
قرأ ما كتبت ..
فخجل من نفسه .. ورمى العلك
.
إستأذنت وخرجت قبل نهاية الدرس ..
كما نصحني رئيس القسم ..
.
حين رآني أخي ..
أخبرني أن صديقه حاول أن يسلم علي ..
ولكني لم أسمح له وكنت "منفسا" ..
.
إستغربت ..
"متى هذا يا صبي؟"
.
وضحكت للمرة المئة ..
حين قال لي أنه من أطل من النافذة ..
.
=====
.
كان هذا ..
سردا لتفاصيل اليوم الأول والثاني ..
لي كمعلم ..
.
=====
.
"كان الله في عون الجيل القادم ..
وكان الله في عوني أيضا ..
فزميليّ بالقسم منسقان سابقان في قائمة الوسط الديمقراطي"
.
مداعبة للزميلين :
أستاذ علي العبدالله
أستاذ حسين نزر
.
=====
.
الأستاذ سعد المحطب
31-3-2010
.
قسم الاجتماعيات
ثانوية الامام مالك

هناك 32 تعليقًا:

غير معرف يقول...

.
قلت له بحزم :
"دش صفك وسكّر الدريشة"

لووول كفوو كفوو بس همن شوي شوي عليهم P:

موووفق وعئبال الدكتوراه :)

NoNi

ebtsamh يقول...

أهلاً بالزميل ..

بس مو جنك داخل بقوة :)

موفق وسدد الله خطاك

غير معرف يقول...

الله يعين الجيل القادم مأجورين بإذن الله .... سعد صج قبل لا تمشي قلت لهم باجر امتحان قصير ؟!!!!!(:

ناصر السلطان

princess adadi يقول...

اي والله وايد حازم
عاد قالوا الحزم زين بس مو جذي
الطلبة يحبون المعلم اللين واللي يشاركهم سوالفهم بس وقت الجد او اذا صار الشي عن حده هني خلك حازم
اذكر كنا نستانس لما تدرسنا ابلة صغيرة لانها تفهمنا وتعاملها معانا غير عن الابلات
لا تخليهم يكرهونك من اولها
خلك استاذ كول في حدود المعقول
وحاول تتقرب منهم

مبروك التعين :)

Ƒiona H. Al- Ƨharekh يقول...

يعطيك العافيه استاذ
خلك حازم معاهم أحسن
وشي حلو انك قريب من عمرهم لأنك راح تفهمهم أكثر
تحيأتي ؛*

شاي الضحى يقول...

مبرووووك الوظيفه

والله يعينك على حنة الجرس

اجتماعي يقول...

.. نوني ..

اميين ..
مشكورة وماقصرتي : )

=====

.. ابتسامة ..

هلا فيج يالزميلة ..
ايي لازم اول يوم نزف ونطق : d

مشكورة : )
حياج الله ..

اجتماعي يقول...

.. ناصر ..

ايي امس كان امتحان قصير ..
ويوم الاحد بعطيهم فاينل ..

=====

.. princess adadi ..

عشان الشي ما يزيد عن حده ..
لازم اوريهم من اول يوم ان ماعندي يمين يسار : )

الحين انا بالنسبة للطلبة ..
نفس مدرسنا بالثانوي بالنسبة لنا ..
هم بعد كان عمره 22 ..

فـ نطري ..
توصلج الأخبار إن شاء الله

"أخبار زينة مو زف وطق :d "

الله يبارك فيج بنيتي الطالبة : )

اجتماعي يقول...

.. فيونة ..

الله يعافيج ويخليج ..

افاا عليج ..
حزم ما بعده حزم : d

حياج الله بنيتي الطالبة ..

=====

.. شاي الضحى ..

الله يبارك فيج ..
ويعينج على قعدة البيت : )

الحارث بن همّام يقول...

حاول تتذكر شلون كنا نينن المدرسين ايام الثانوي :)

بومحطب ما ودك تشارك بمسابقة أفضل مقال؟ فرصتك زينة وجوائز حلوة ولجنة تحكيم قوية.. فكر فيها..
اكتب مقالة ودزها على هالموقع
www.jalees.org

اجتماعي يقول...

.. الحارث بن همام ..

قريت الايميل ..
وأكيد ودي أشارك ..

إن شاء الله هاليومين أدز المشاركة

شكرا بو خضر : )

الغـــــدوف يقول...

ألف مبروك أستاذنا
الله يوفقك ويسدد خطاك

أشرف مهنه وأنبل عمل

أماسي خير ومسرات

عبير بقلمي الصادق يقول...

شوي شوي على الطلاب

أنا منهم والكل يقول مشاغبة

لكن دائماً نحب نتعرف على المدرس الجديد بطريقة لا تنسى ..

فالحياة مرة اليوم طالب بكرة معلم

أهلاً بك أستاذ الإجتماعيات ..

الطالبة : عبير الربيعي

غير معرف يقول...

ألف مبروووك عالوظيفة

وشوي شوي عالطلبة لا تشد عليهم ولا تلين امسك العصاة من النص :)

فاطمة المضيان

*Being One يقول...

و التدريس شغله حلوه و المواقف و السوالف ما تخلص
موفق انشالله =)

SCRIBBLE ..♥ يقول...

ماشاءلله تبارك الرحمن ..

لانك قريب من سن الطلاب فبتكون العلاقة جميله وممتعه بإذن الله ..

موفق =)

shaab يقول...

على البركة اخوي سعد على هذه الوظيفة العظيمة
والله يعينك على التدريس بس ما ادري ليش احس ان الطلبة راح يحبونك وايد

موفق

غير معرف يقول...

الله وناسه احب اجواء المدراس بس اكون صاحبة سلطه فيها ............
الله هالله بالطلبه خلك متسامح معاهم قششهم الامتحان اوعطهم كيرف علشان يحبون الماده والدوام...........
موفق يا استاذ
مع تحياتي معلمة الاجيال القادمه فاطمه الفوزان

Engineer A يقول...

ههههه


موفق يارب بحياتك العملية الجديدة .. ومن اولها مخرعهم؟؟

غير معرف يقول...

بالامس كنت طالبا واليوم اصبحت مدرسا

مبروك للاستاذ سعد :)

اخوي سعد مو انت تخصصك علم نفس شلون صرت مدرس لاني ابي اصير مدرسة بس يقولون تخصصنا ما ينفع الا انا نكون اخصائيات

وشكرا

شموسه

Wesal Media يقول...

don't miss it :)


عندما يضع الناس صورة وهميّة مختلفة تماماً عن الواقع؛


تبدأ قصة حمد..

http://www.ready4omah.blogspot.com/

اجتماعي يقول...

.. الغدوف ..

الله يبارك فيج ويخليج ..
مشكورة وماقصرتي : )

حياج الله ..

=====

.. عبير بقلمي الصادق ..

أهلاا فيج بنيتي الطالبة المشاغبة D:
شرفتي : )

حياج الله ..

اجتماعي يقول...

.. فاطمة المضيان ..

الله يبارك فيج ويخليج ..
حاضر : )

=====

.. beeing one ..

ايي والله ..
باسبوعين صارت عندي سوالف الدنيا ..

بتكلم عنها بالايام الياية إن شاء الله : )

مشكورة ..

اجتماعي يقول...

.. scribble ..

صح كلامج ..
بس الله يستر من اللي صار اليوم ..

مشكورة ..

=====

.. shaab ..

الله يبارك فيك ويخليك ..

يحبوني ؟!

الله يسمع منك : )

اجتماعي يقول...

.. فاطمة الفوزان ..

الغش ممنوع منعا باتا عند الاستاذ سعد : )

اما الكيرف .. ترا مو دكتور : d

حياج الله أبلة فاطمة : )

=====

.. engineer A ..

الله يخليج ويحفظج ..

مخرعهم وبس !!
اليوم بغيت أفصل واحد : d

داش بقوة ..

اجتماعي يقول...

.. شموسة ..

أهليين بالزميلة ..

إهو تفلسف فقط لا غير ..
تصيرين مدرسة وانتي تضحكين بعد : )

مو شرط خريجة تربية ..

أغلب الشباب اللطفاء اللي تخرجوا معاي ..
صاروا مدرسين الحين ..

تخرجي وقدمي على التربية ..
والله يوفقج : )

=====

.. وصال ..

إن شاء الله : )

الياقوت يقول...

موفقين يا رب .. والجميل هو أن تكونوا لينين وحازمين بنفس الوقت

فوقت الضحك ضحك ووقت الجد جد ..

: )

وعلى فكره هم الكيرف موجود في التدريس بس هالأمر بذكاء المدرس يقدمه للطلبه

؛)

غير معرف يقول...

ربي يوفقك بالوظيفه اليديده ، بس بغيت اسألك انا زميلتك بالجامعه والحين اخر كورس لي واتخرج صج ودي اصير مدرسة علم نفس بس قالوا خريجين الاجتماعيه مايعينون مدرسين في اكتفاء وخاصة البنات يمكن ، ماادري نزهب الواسطه من الحين وله الله يفتحها علينا ويعينونا مدرسات؟ اخاف احط رغبتي التربيه يعنوني اخصائيه بمدرسه :( مابي اخصائيه بمدرسه :(

اجتماعي يقول...

.. الياقوت ..

ومنكم نستفيد ..
مادري شلون كيرف بالمدرسة ..

بس نسأل ونجرب : )

=====

.. غير معرف ..

بصراحة ما أدري ..
إحنا قدمنا تدريس وانقبلنا على طول ..
ولا يابوا لنا طاري الاخصائي ..

اما سالفة الاكتفاء ..
فـ مادري .. لا أوهقج : )

سئلي بنات أحسن ..

حياج الله ..

she is me يقول...

معلم!!
وأنا أقرأ ضوى أمامي إعلان (معلمي سر تميزي)..!

ومن الصور التي ابتدعتها مخيلتي..صورة الرجل الواقف بالاعلان وتخيلتكم هو..
هيبة مدرسين أفاضل وشارب أبيض وقور ويد حنونة وعيون محبة..

عندما قلتم( في السنوات العشر القادمة ..وبعدها...) ضننتكم تخططون للهرب ! وكدت أجزم بذلك!!
لكن.. تحية للذي للذي يخطط للمضي قدما.. من ذا الذي يقول أن التدريس طمس للطموح!


وفقكم الرحمن وسدد خطوكم ونثرت السعادة والرضا في دربكم..

غير معرف يقول...

الف الف مبرووك اخوي سعد من صج فرحتلك


بس بسألك انتا مو تخصص علم نفس شكو مدرس اجتماعياات ؟؟!

اجتماعي يقول...

.. she is me ..

عاد تصدقين إن الطالب اللي بالصورة ..
عندنا بمدرستنا ..

ما شاء الله عليه ..
صج مميز إهو وأخوه : )

الله يستر من الياي بالتدريس ..
وعسانا ما ننحاش منه ..

شكرا لج : )

=====

.. غير معرف ..

هالسنة اطق طق اجتماعيات ..
والسنة الياية علم نفس ..
ويمكن دستور بعد !!

عادي ..
إحنا بالكويت : )

على خطى المدينة الفاضلة