السبت، 6 فبراير 2010

من ذكريات الميداني 1

بسم الله الرحمن الرحيم
.
بدأ إجتماع طلبة التدريب الميداني ..
وبدأت الدكتورة والمعيدات بشرح قواعد التدريب ..
.
كنا في قاعة كبيرة .. قاعة 127
وقالت بعض الطالبات أن الصوت غير مسموع ..
.
سألتنا الدكتورة أمثال الحويلة ..
إن كان هناك داع لاستخدام "المايك" ..
.
فأردت أن "أتحرش" بها ..
"لا ماله داعي .. إحنا نفهمج من عيونج" ..
.
ردت "سعد انت عليك سوالف .. !!"
.
بدأ توزيع الطلبة على الأماكن التي يريدونها ..
وكان حسب التسلسل في الكشف ..
.
وللعلم ..
التسلسل يكون حسب الرقم الجامعي .. وحسب الدفعة
.
فجأة ..
سمعتها تنادي إسم زميلي .. من دفعة 2006
أي أنها إنتهت من أسماء دفعة 2005 "دفعتي" ..
.
وإذا بي أكتشف أن موظفة العمادة المحترمة ..
قد أسقطت إسمي سهوا .. أثناء تناولها الافطار "ربما"
.
ركضت لتصحيح الخطأ وعدت ..
قلت للدكتورة أني أريد الطب النفسي ..
.
فقالت أن العدد المطلوب هو 30 ..
فليس أمامك غير وزارة التربية ..
.
وبعد شد وجذب ..
و "مناشب" شديد ..
.
قالت :
"سأحاول إضافتك في الطب النفسي ..
ولكن مؤقتا إختر مكانا آخر"

.
فقلت :
"الطب النفسي ..
وأيضا أريد صديقي الغائب معي"

.
بدأ التدريب رسميا ..
وبدأ العذاب رسميا ..
وبدأت "لوعة الجبد" رسميا ..
.
لم أكن أعلم أني سأعيش حياة الاستخبارات ..
فجأة .. تدخل علينا المعيدة دون سابق انذار
.
وتحاسبنا على كل شيء ..
علما بأن وظيفتها ليست بهذه الطريقة ..
.
أوقعتني في موقف حرج لا أحسد عليه ..
مع الدكتور المشرف على تدريبنا ..
.
كان طيبا جدا ..
متفهما ومتعاونا ..
.
لكن تنقصه الحيوية ..
فالبرود كان مسيطرا عليه ..
.
كان "الله يذكره بالخير" ..
كلما أحس أننا "فاضين" ..
يطلب أن نطبق اختبار "وكسلر" على المرضى ..
.
لا بأس بهذا الاختبار ..
ففيه من الطرائف الشيء الكثير ..
.
الطرائف تكون من إستجابات المرضى ..
وبعض ردود أفعالهم ..
.
أذكر أحدهم ..
كان ملولا لدرجة لا تطاق ..
.
كلما أسأله سؤالا ..
يجيب دون تفكير "ما ادري" ..
.
وبعد أن سئم مني ومن أسئلتي ..
.
"يبا شوف .. الاختبار اعتبره لك
جاوب مثل ما تبي .. وأنا موافق"

.
"للحديث بقية .. والصور في النهاية"
.
سعد المحطب
6-2-2010

هناك 19 تعليقًا:

mazageya يقول...

جميله هي الذكريات لانها حلقه وصل بين الماضي والحاضر ..
ولكن الاجمل من ذلك ان كانت ذكريات جميله ترسم الابتسامه على افواهِنا ..
ابتسمت حين قرأت ( لا ماله داعي .. إحنا نفهمج من عيونج" .. )

دعابه جميله ..

ابتسم ^_^ يقول...

السلام عليكم
مساء النور
لووووول ..سعد انت عليك سوالف ..
شكلها متعوده
ياحليله المريض مرة ماله خلق يجاوب
ان شاء الله جاوبت عنه؟
يازين الذكريات حتى لو كانت عذاب الحين تذكر وتتبتسم لها
الله يوفقك وان شاء الله تتوظف في القريب العاجل

Omaise يقول...

فأردت أن "أتحرش" بها ..
"لا ماله داعي .. إحنا نفهمج من عيونج" ..


اتخيلك انت وضحكتك السقيلة وبالكلاس ولك

السقيلة = لكن احبها حقا
كما احب رؤيتك

شكرا سعد
وتكفى خل نضحك متى الصور

●• ۈحيدة بليآهُم•● يقول...

حلــوة الذكريــات ..
اظن دووم بتذكر اللي صاار ويااك ..

مب جنك عورت راس المريض خخخ >>اسوولف ..

المهم ما قلت لك مبروووووك ع التخرج >> تو النــااس ..

ادري خخخ


تقبل مرووري ..

أختك وحيدة بلياهم ..

اجتماعي يقول...

.. مزاجية ..

شكرا لج ..
والفال لج تذكرين لنا ذكرياتج الدراسية ..

حياج الله ..

=====

.. ابتسم ..

وعليكم السلام ورحمة الله وبركاته ..

مو بس متعودة ..
إلا كانت شايفة الويل : d

المريض وقفت الاختبار عنه ..
لان درجته بتطلع صفر بهالحالة ..

شكرا لج ..
وحياج الله : )

اجتماعي يقول...

.. مويس ..

ضحكتي سقيلة !!
ماشي ..

حبتك العافية D:

الصور المرة الياية إن شاء الله ..
حياك الله ..

=====

.. وحيدة بلياهم ..

الله يبارك فيج ويخليج ..
المريض اهو اللي عور راسي : )

ماقصرتي ..
حياج الله ..

Fishah يقول...

ههههههههههههه حلوه هالسوالف :>

اشوا ما ودوك التربيه .. المكان مو حلو الصراحه ..

يحليله المريض يبي الفكه هههههه


انزين يالله نبي بعد ذكريات :))

she is me يقول...

أجمل شي .. الذكرياات

متاابعوون

شعلة أمل يقول...

اشمعنى اسمك اسقطوه سهوا !
على هالغلطه المفروض يحطونك بالمكان اللي تبيه بدون مناشب لوول

ذكريات حلوة
عجيبه د امثال
شوقتنا اخ سعد

--
عقبال الدكتوراه يارب : )

نوره يقول...

حلووو ان الشخص يصر على رأيه
ويتمسك بالشي اللي يبيه
ما أذكر إني خلال وجودي بالجامعه تمسكت برأي
للأسف ما كان في تشجيع من قبل حزب الدكتاتوريه (بعض الدكاتره)
يعطيك العافيه ذكريات مميزه من كاتب مميز

ReLaaaX يقول...

ولاااازلنا نتظر الصور .. عشان نعيش وياك الاحداث :))

غير معرف يقول...

انزين لو ما كانو حاطينك بالطب انفسي شكنت بتسوي P:
وشسويت مع المريض اللي مو راضي ايجاوب لووول
ناطرين اذكريات الثانيه :)
NoNi

Engineer A يقول...

أكثر شي أثار حفيظتي "ان اسمك سقط سهواً" اااااااااخ بأذبحهم عمادة القول والتسجيل للحين على سوالفهم :)

بانتظار البقية .. ذكريات مشوقة من بدايتها ..

رورو الشخبوطه يقول...

السلام..

حلو المكان بس يبيله قلب..

وسالفة ناسين اسمك بيه انا بالميداني طلع لي الرقم الاخير :\

وناطرين باجي ذكرياتك..

موفق يارب..

اجتماعي يقول...

.. fishah ..

إن شاء الله ..
just wait : )

حياج الله ..

=====

.. she is me ..

أجمل شي المتابعة : )

اجتماعي يقول...

.. شعلة أمل ..

حطوني بالمكان اللي أبيه ..
بس بعد شنو !!

تسلمين ..
مشكورة : )

=====

.. نورة ..

من ألذ الشغلات بالجامعة ..
إهي التمسك بالراي والتحرش بالدكاترة : d

طافتج هالمتعة ..

حتى لو دكتاتوري ..

أقود حزب المعارضة ..
وغالبا ما أتحسف نهاية الكورس : d

اجتماعي يقول...

.. ReLaaaX ..

إن شاااااء الله : )

=====

.. NoNi ..

لو مو حاطيني ..
أعتقد كنت بعصب وبزعل .. وإحتمال أسحب أوراقي وأقدم على التطبيقي : )

والمريض طلعته .. ويبت واحد غيره

اجتماعي يقول...

.. Engineer A ..

ولعقب باجر على سوالفهم ..

عيل أكو موظفات ما يعرفون شغلهم؟
أكو موظفات أنا طالب وأعلمهم شروط التحويل؟

خليها على الله بس : )

إن شاء الله ..
مشكورة ..

=====

.. رورو الشخبوطة ..

وعليكم السلام ..

إيي والله ..
صج وناسة .. بس عوار قلب

إن شاء الله ..
مشكورة : )

غير معرف يقول...

2006 و تخرجوا ....تبارك الرحمن
وعلي عليهم طلبة العلوم والهندسه ...

على خطى المدينة الفاضلة